Ning Indramayu ana kali arane kali Cimanuk,
kaline amba pisan, lan miline santer. Kali Cimanuk sing liwat desa Pecuk ana
kedunge, sing diarani kedung yaiku panggonan sing paling jero kadang-kadang ana
ulekane ndrawasi pisan, kedung mau arane Kedung Srengenge.
Kedung Srengenge wis keceluk tempat sing
medeni lan mbebayani utawa ndrawasi, sebab wis akeh korbane mulane keceluk sato
mara sato mati, menusa mara menusa keplayu, mulane akeh sing beli wani ngambah
apa maning wani adus ning kono, kenangapa? Sebab akeh buayane.
Ning sewijining dina ana kebo lagi
lelumban (adus) ning Kedung Srengenge, kayane kebo sing daerah sejen, dadi bli
ngerti kaanan Kedung Srengenge sing gawat iku, ketara katon ayem lelumbane, bli
suwe kebo lagi adus lamat-lamat kebo krungu swara gereng-gereng sambat njaluk
tulung, ditiling-tilingaken tambah cetha swara sesambat iku.
“aduuuh...aduuuh...kita
tulungana...tulung...” mengkonon swara mau bolak-balik, kebo clingak-clinguk
nggulati asale swara, kayae parek...tapi ning endi, bareng dijinggleng jebul
ana buaya gede ketindihan wit randu gede, kayane dungkar nindihi buaya sing
lagi pepe.
Kebo bareng weruh baya bli dipikir dawa
maning terus ngupai pitulungan, wit randu sing nindihi buaya disrungkal bari
sungune, alon-alon, setitik-setitik suwe-suwe kayu sing nindihi bisa
disingkiraken sing awake buaya. Buaya terus diunggahaken ning pundake terus di
gawa ning tengah kedung, pikirane melas weruh kaanan awake buaya sing kelaraan
lan lemes, tapine bareng tekan ning tengah kali arep arep dibrukaken kebo kaget
pisan, sebab punuke krasa lara lan perih.
“aduuh...kodikit...kodikit kenangapa
sira nyokot gigire kita?” omongane kebo bari gugup lan kelaraan. “kita mau tembe
bae tetulung bari sira, kenangapa sira malah mbales blesak, malah nyokot punuke
kita. Apa ku bener?”
“jarene kita sih bener, baka nulung aja
setengah-setengah, sekiyen wetenge kita ngelih pisan, sebab wis limang dina
kita durung mangan, mulane Bo, gelem ya sira tak pangan, sebab kita bli duwe
tenaga”.
“tapi iku sing diarani kurang ajar, bli
bisa mulang trima, ditulung malah menthung, kudune ngucapaken kesuwun malah
gawe cilaka sing nulung, iku bli adil”.
“apa sira bli percaya tumindake kita
bener Bo”. Omongane Buaya motong omongane Kebo.
“ya iya bae kita bli percaya, masa wong
ditulung mbalese menthung, jare sapa mengkonon kuh?”
“baka beli percaya coba tanonana Klasa
amoh sing lagi kentir iku”
“Klasa...Klasa...mandega dingin, kita
arep takon bari sira”. Ngundange Kebo ning Klasa amoh sing kentir.
“arep takon apa? Kayane penting pisan Bo”
“mengkenen Sa, kita tembe bae nulungi
buaya sing ketindihan wit rantu gede, barang wit randu gede mau tek singkiraken
terus Buaya tak gawa ning tengah kali tak ateraken ning tengah kedung, tapine
bareng tekang ning tengah-tengah kedung Buaya malah nyokot gigire kita lan arep
mangan kita, apa kelakuan sing kaya mengkonon iku bener?”
“jare kita sih bener, lan bener pisan”. Jawabe
Klasa bari sandean watu supaya bli kentir.
“lho...lho,,,dadi aneh lan lucu”. Semaure
Kebo krungu jawabane klasa.
“mengkenen mas Kebo...bengen wektu kita
masih anyar, kita ngladeni ning majikan hormat pisan, aja sampe majikan kita
kotor, arep jagongan, turu, mangan, sampe tekan tahlil slmaetan mesti klasa
digelar supaya majikan lan keluarga utawa tamu-tamune bli kotor kenang lemah
lan kademen, sampe pirang-pirang taun, tapi.... apa balesane bareng kita wis
rusak lan amoh...kita disiya-siya...sing nglarani ati kita dibuwang
dikentiraken ning kali, jare mas Kebo iku apa bener?”. Omongane klasa
njelasaken.
“kuh ... toli bener jaree kita, mulane
wis sira meng bae lan nurut tak pangan Bo, kita wis ngelih pisan”. Omongane Buaya
bungah sebab ana sing ngrewangi mbeneraken.
“aduuh...aduuh...mengko dingin...aja
keburu-buru, coba culna dingin...mangan ya mangan, tapi dirembug dingian”. Omongane
Kebo kelaran.
“arep rembugan apa maning? Apa bli
krungu mau Klasa nerangaken baka kita sing bener, kurang apa maning?”
“mengko dingin... kaen ana sapu sing
lagi kentir mene, bokat bae bisa ngudari masalahe kita”
“ya wis ... tapi cepet...sebab wetenge
kita ngelih pisan”
“Sapu...Sapu... tulung mandega dingin,
kita pengen nalar bari sira, apa bener kita nulung Buaya, tapine Buaya malah
mbalese malah arep mateni kita, yaiku mangan awake kita, apa iku bener?”
“oooo, iku..., bener Bo...., kita bengen
ya mengkonon, kita angger tetulung bari menungsa majikane kita, yaiku gawe
bersih, latar bersih, jogan bersih, kamer bersih, sawang-sawang bersih, laka
tempat sing bli bersih, sebab kita bli seneng baka ana tempat sing suker, tapi
apa balesane bari kita? Sewise kita tuwa, rusak, blesak, boro-boro kesuwun
paling belie disimpen, tapi malah kita dibuwang lan dikentiraken ning kali
mengkenen, apa iku dianggep bener?”
“kuh bener toli omongane kita, jare
Klasa ya mbeneraken, Sapu yaa mbeneraken..., dadi apa maning, wis sekiyen
pasrah bae tak pangan sebab kita wis ngelih pisan”. Semaure Buaya bari nyokot
gigire Kebo tambah jero, Kebo jejeritan kelaran.
“aduuuuuh...aduuuuh...tuluuung....tuluuuung...”
sesambate Kebo melasna pisan.
Kebeneran ning wektu iku ana Kancil
liwat, weruh lan krungu sambate Kebo sing lagi kelaran, Kancil mandeg bari
takon.
“ko dikit...kodikit, Bo lagi apa ning
tengah kedung? Ana apa Buaya nyokot gigire Kebo lagi apa apaan?” omonge Kancil,
Buaya kaget bari ngomong.
“la sira Cil, sira bli kena melu-melu,
kiyen urusane kita bari Kebo”. Omongane Buaya rada curiga bari Kancil.
“aduuuh....Cil....kita tulungna”. Penjaluke
Kebo ning Kancil.
“kita bli garep urusan karo sira Ya,
mung lucu ana Kebo ditunggangi Buaya, sing ditunggangi tekarani lagi nembang
ee...beli ngertine lagi nangis kelaran, kita dadi bingung...kepriben mau-maune”.
Omongane Kancil.
“mengkenen Cil critane, kita mau nulungi
Buayasing ketindihan wit randu gede, bareng wite tek singkiraken, Buaya tak
bopong ning tengah kedung, tapine bareng tekan ning tengah kedung Buaya malah
nyokot gigire kita, beli kuen bae yaiku pengen mangan awake kita, coba apa iku
bener?” wadule Kebo bari Kancil.
“jaree kita bener”. Panjerite Buaya bari
nyewot.
“ya...ya..wis...wis...aja pada tukaran
sebab kayane bener kabeh, ndeleng Kebo bener, ndeleng Buaya ya bener”. Omongane
Kancil supaya Buaya seneng.
“sekiyen mengkenen bae, supaya Buaya
bisa cepet-cepet mangan daginge Kebo sing lemu iku, kita pengen weruh awit-awite
ning endi Buaya wektu ketindihan wit randu gede, coba Bo minggira dingin...Bo
angkat wit randune coba dipasang maning ning awake Buaya, supaya Buaya bisa
mangan daginge Kebo sing seger iku”. Ngrasa Kancil ngrewangi Buaya...bli
dipikir maning, Buaya nurut apa sing sing diprentahaken ning Kancil, bareng
Buaya wis ketindihan maning, Kancil gage-gage narik Kebo nglungani panggonane
Buaya ketindihan.
“wis, ayo sekiyen pada lunga bae Bo,
Buaya aja ditulung maning, sebab kewan sing bli bisa mbales budi ning kewan
sejen, baguse ditinggal bae”.
Bubar ngomong, Kebo bari Kancil terus
lunga, Buaya balik gereng-gereng sambat-sambat njaluk tulung, tapine sampe mati
bli ana sing gelem nulungi.
